သျှမ်းသံတော်ဆင့်၊ MPA၊ The Red Flag
ဓာတ်ပုံဟောင်းကို အသုံးပြုပြီး တအာင်း (ပလောင်) အမျိုးသားလွတ်မြောက်ရေးတပ်မတော် TNLA ၏ စစ်ဦးစီးချုပ် ဒုဗိုလ်မှူးကြီး တာဟိုပလန်၏ သိန်းပေါင်း ငါးသောင်းကျော်တန်ဖိုးရှိ မူးယစ်ဆေးဝါးများကို ပြည်သူ့ကာကွယ်ရေးတပ် PDF က ဖမ်းဆီးရမိကြောင်း သတင်းအမှားဖြန့်ချိနေပါသည်။
ဆိုင်းလိတ် (နာမည်) ဆိုသည့် လူမှုကွန်ရက်အကောင့်တစ်ခုမှ “TNLA တာဟိုပလန်ရဲ့ သိန်းပေါင်းငါးသောင်းကျော် တန်းဖိုးရှိမူးယစ်ဆေးကို NUG စစ်ဒေသက ဖမ်းဆီးလိုက်လို့ NUG PDF တွေကို ရှမ်းမြောက်မှာဖမ်းဆီးခြင်း၊ အနှောက်ယှက်ပေးခြင်း ဆက်တိုက်လုပ်နေ” ဟု (မူရင်းအရေးအသားဖြင့်) စတင် ရေးသားဖြန့်ချိခဲ့သည်။
ထိုသတင်းအမှားကို စစ်ကောင်စီအားပေး တယ်လီဂရမ်ဝါဒဖြန့်ချန်နယ်များ ဖြစ်သည့် Ka Ka Han၊ ဟန်ငြိမ်းဦး၊ ရွှေဘ အပါအဝင် အခြား စစ်ကောင်စီဝါဒဖြန့် တယ်လီဂရမ်ချန်နယ်များကပါ ထပ်ဆင့်ဖော်ပြထားပြီး PDF က ဖမ်းဆီးရမိသော မူးယစ်ဆေးဝါးဓာတ်ပုံနှင့်အတူ ဖော်ပြခဲ့သည်။
ဟန်ငြိမ်းဦးချန်နယ်မှ ဖော်ပြခဲ့သော သတင်းအမှားတွင် ကြည်ရှုသူပေါင်း ၁၄,၀၀၀ ကျော်ရှိသည်။
မူရင်းလင့်ခ် – https://archive.ph/1aooF
Ka Ka Han – https://archive.ph/Pi5No
ဟန်ငြိမ်းဦး – https://archive.ph/2YpgW
ရွှေဘ – https://archive.ph/IwCrX
စစ်ကောင်စီဝါဒဖြန့်ချန်နယ်များမှ ဖော်ပြခဲ့သော ဓာတ်ပုံ အကြောင်းအရာကို MFCN အဖွဲ့ဝင် သျှမ်းသံတော်ဆင့်နှင့် MPA တို့၏ အချက်အလက်စစ်ဆေးသူများက Google Reverse Image Search ဖြင့်စစ်ဆေးကြည့်သည့်အခါ ဓာတ်ပုံအဟောင်းကို အသုံးပြုပြီး ဖြန့်ချိနေသည့် သတင်းအမှားဖြစ်နေကြောင်း စိစစ်တွေ့ရှိခဲ့သည်။
စစ်ဆေးတွေ့ရှိချက်
စစ်ဆေးတွေ့ရှိချက်အရ စစ်ကောင်စီ ဝါဒဖြန့်ချန်နယ်များမှ ဖော်ပြခဲ့သော ဓာတ်ပုံသည် ၂၀၂၂ ခုနှစ် စက်တင်ဘာလ ၆ ရက်က စစ်ကိုင်းတိုင်း တမူးမြို့နယ်အတွင်း ပြည်သူ့ကာကွယ်ရေးတပ်မတော် (တမူးမြို့) တပ်ရင်း (၃) မှ မူးယစ်ဆေးဝါးဖမ်းဆီးရမိသည့် ဓာတ်ပုံဖြစ်ကြောင်း တွေ့ရှိခဲ့သည်။
၂၀၂၂ ခုနှစ် စက်တင်ဘာလ ၆ ရက်နေ့ နေ့လယ် ၁ နာရီ ၉ မိနစ်အချိန်ခန့်တွင် တမူးမြို့နယ် ခွန်မွန်းနွန် ကျေးရွာအနီးတွင် မန္တလေးမြို့မှ တမူးမြို့ဘက်သို့ မောင်းနှင်လာသည့် မော်တော်ယာဉ်အား ရပ်တန့်စစ်ဆေး ရှာဖွေမှုများပြုလုပ် ဆောင်ရွက်ခဲ့ရာ မော်တော်ယာဉ်အတွင်း သိုဝှက်သယ်ဆောင်လာသော တရားမဝင် စိတ်ကြွ ရူးသွပ်ဆေးပြား (WY) အများအပြားကို ပီနံအိတ်ဖြူ ငါးလုံးဖြင့် သယ်ဆောင်လာခြင်းအား သိမ်းဆည်းရမိခြင်း ဖြစ်သည်။
တမူး တပ်ရင်း (၃) ထုတ်ပြန်ချက် –
Google တွင် “စိတ်ကြွမူးယစ်ဆေးဝါးများ တမူး PDF ဖမ်းဆီး” ဆိုသော Keywords ဖြင့် ရှာကြည့်သည့် အခါ၌လည်း တမူးမြို့နယ်၌ WY ဆေးပြားများထည့်ထားသည့် ပီနံအိတ် ၅ လုံး တမူး PDF သိမ်းဆည်းရမိကြောင်း လွတ်လပ်သောသတင်းဌာနများက ဖော်ပြထားသည်။
Zalen –
Tachiliek News Agency –
DVB-
Mizzima –
သုံးသပ်ချက်
ထိုကြောင့် TNLA စစ်ဦးစီးချုပ် ဒုဗိုလ်မှူးကြီး တာဟိုပလန်၏ သိန်းပေါင်းသောင်းကျော်တန်ဖိုးရှိ မူးယစ်ဆေးဝါးများကို ပြည်သူ့ကာကွယ်ရေးတပ် PDF က ဖမ်းဆီးရမိသည်ဆိုသည့် အကြောင်းအရာက မှားယွင်းနေကြောင်း စိစစ်တွေ့ရှိခဲ့သည်။
သတင်းအမှားဖြန့်ချိသူများက စစ်ကောင်စီတပ်ကို ဆန့်ကျင်တော်လှန်တိုက်ခိုက်နေသည့် တိုင်းရင်းသားလက်နက်ကိုင်တပ်ဖွဲ့များနှင့် PDF များအကြား အချင်းချင်းအမုန်းပွားစေရန် ရည်ရွက်ချက်ဖြင့် မသက်ဆိုင်သော အကြောင်းအရာများ၊ ဓာတ်ပုံဟောင်းများကို အသုံးပြုပြီး သတင်းအမှားဖြန့်ချိနေလျက် ရှိသည်။
စာဖတ်သူများအနေဖြင့် သတင်းတု၊သတင်းမှားဖြစ်နေသည်ဟု သံသယရှိသည် ဖြစ်စေ၊ မှန်ကန်သော သတင်း ဟုတ်၊ မဟုတ်အတည်ပြု မေးမြန်းလိုသည်ဖြစ်စေ၊ Fact Checking ပြုလုပ်ပေးသည့် သတင်းဌာနများ၊ အဖွဲ့အစည်းများ၏ Chat Box မှ သွားရောက်မေးမြန်းကြရန် တိုက်တွန်းလိုပါသည်။
Myanmar Fact-checking Network အဖွဲ့ဝင်များ အချက်အလက်စစ်ဆေးထားသည့် သတင်းများကို ဤနေရာတွင် ဝင်ရောက်ဖတ်ရှုနိုင်ပါသည်။
